EM KARLA Í KÖRFUBOLTA

Íslenska karlalandsliðið í körfubolta tekur nú þátt í öðru Evrópumótinu í röð. Íslenska liðið er í A-riðli og mætir Grikklandi, Póllandi, Frakklandi, Slóveníu og gestgjöfunum Finnlandi.

KLASSÍKIN OKKAR OG MENNINGARVETURINN

Föstudaginn 1. september var bein útsending á RÚV þar sem nýjum menningarvetri var fagnað og fjallað um það helsta sem í boði verður í menningarlífinu í vetur. Í annað sinn tóku Sinfóníuhljómsveit Íslands og RÚV saman höndum og gáfu landsmönnum kost á að ráða efnisskránni á fyrstu tónleikum hljómsveitarinnar á starfsárinu. Boðið var til sannkallaðrar óperuveislu í samstarfi við Íslensku óperuna í beinni útsendingu úr Eldborgarsal Hörpu.

LOFORÐ

Ný íslensk þáttaröð fyrir alla fjölskylduna. Loforð er ljúfsárt drama um skilnað foreldra séðan með augum barna þeirra og þau áhrif sem þessar óvæntu sviptingar hafa á tilveruna. 

NÝDÖNSK SJÁLFSHÁTÍÐ

Nýdönsk hélt á dögunum tónleika í troðfullum sjónvarpssal ásamt strengjasveit og bakröddum. Hljómsveitin lék lög frá þrjátíu ára ferli sínum ásamt nýjum lögum af næstu plötu sem kemur út innan tíðar.

KÓÐINN 2.0

KrakkaRÚV heldur námskeið fyrir tíu krakka í 8.-10. bekk sem fjalla um viðburði Barnamenningarhátíðar í Reykjavík fyrir Krakkafréttir.

BÓKMENNTAHÁTIÐ Í REYKJAVÍK

Rás 1 fjallar að venju ítarlega um Bókmenntahátíð í Reykjavík. Sent er út frá setningu hátíðarinnar, tekin viðtöl við höfunda og fjallað um verk þeirra, bæði í aðdraganda hátíðarinnar og á meðan hún stendur yfir.

UNDANKEPPNI HM KARLA Í FÓTBOLTA

Íslenska karlalandsliðið í fótbolta verður í eldlínunni í undankeppni HM í fótbolta. Íslenska liðið leikur við Finnland og Úkraínu í september og Kosóvó og Tyrkland í október.

MEÐ FULLA VASA AF GRJÓTI

Leiksýningin Með fulla vasa af grjóti verður í beinni útsendingu frá Þjóðleikhúsinu 1. október. Hilmir Snær Guðnason og Stefán Karl Stefánsson fara með öll hlutverkin í þessu fyndna og hugljúfa verki.

SKREKKUR

Skrekkur er árleg hæfileikakeppni fyrir grunnskólanemendur í Reykjavík. Allir grunnskólar með unglingadeild geta sent eitt atriði í keppnina. Á vef KrakkaRÚV verður hægt að fylgjast með undirbúningi þátttakenda.

DEILT MEÐ TVEIMUR

Tónlistarhátíð Rásar 1 sem fer fram í Hafnarhúsi 28. október. Fjórir tónlistarmenn völdu sér tvo listamenn til samstarfs hver og afraksturinn eru fernir tónleikar með frumfluttum verkum eftir íslensk tónskáld. Tónleikarnir eru sendir út í beinni á Rás 1 og í myndstreymi á RÚV.is.

HUGMYNDA- DAGAR RÚV

Hugmyndadagar RÚV verða haldnir í fyrsta sinn 10. –
11. október en þar geta hugmyndasmiðir, höfundar, framleiðendur og aðrir kynnt tillögur að efni fyrir dagskrárstjórum RÚV.

ICELAND AIRWAVES

Iceland Airwaves 2016 mun fara fram í Reykjavík dagana 2.-6. nóvember. Rás 2 hefur fylgst rækilega með þessari stærstu tónlistarhátíð Íslendinga frá því hún hóf göngu sína. Á þeim tíma hefur Rás 2 hljóðritað og sent út hundruði klukkustunda af íslenskri og erlendri lifandi tónlist sem flutt hefur verið á hátíðinni.

JÓLIN Á KRAKKARÚV

Á jólavef KrakkaRÚV má finna jólaútvarp, jóladagatal, jólamyndbönd og svo auðvitað jólakveðjur barnanna. Ef þú vilt komast í jólaskap þá er þetta rétti staðurinn.

JÓLATÓNLEIKAR SINFÓ OG RÚV

RÚV sendir út jólatónleika Sinfóníuhljómsveitar Íslands. Tónleikarnir hafa notið gífurlegra vinsælda og eru orðinn fastur liður jólahaldi margra fjölskyldna. Á tónleikunum eru jafnan fluttar sígildar og heillandi jólaperlur.

ÍÞRÓTTAMAÐUR ÁRSINS

Bein útsending á RÚV frá vali íþróttamanns ársins 2016 er á dagskrá 28. desember auk þess sem farið er yfir eftirminnilegustu íþróttaatvik ársins.

ÁRAMÓTASKAUPIÐ

Enginn dagskrárliður í íslensku sjónvarpi fær viðlíka áhorf og umtal meðal þjóðarinnar og áramótaskaupið. Rétt áður en nýtt ár gengur í garð sameinast þjóðin framan við sjónvarpstækin og fylgist með spésegli af liðnu ári.

HM KVENNA Í HANDBOLTA

Heimsmeistarakeppni kvenna í handbolta fer fram í Þýskalandi. Allar sterkustu handboltaþjóðir heims verða meðal þátttakenda.

JÓLALAG RÍKISÚTVARPSINS

Árið 1987 tók Útvarpið fyrst þátt í samstarfi um jólalög útvarpsstöðvanna í EBU. Var þá fyrsta jólalag útvarpsins, Á jólanótt, samið af Jóni Ásgeirssyni við ljóð Gunnars Dal. Ríkisútvarpið sendi lög til EBU árin 1987, 1988, 1989 og 1992 en frá árinu 1993 hefur nýtt íslenskt jólalag verið frumflutt í hádegisútvarpi á jóladag.

HÁTÍÐARDAGSKRÁ UM JÓL OG ÁRAMÓT

Við munum bjóða upp á veglega hátíðardagskrá í útvarpi, sjónvarpi og á vefnum yfir jól og áramót þar sem nýtt og vandað innlent dagskrárefni verður í hávegum haft.

JÓLAGUÐSÞJÓNUSTAN

Flestir íslendingar þekkja tilfinninguna þegar klukkan er að ganga sex á aðfangadag og kirkjuklukkurnar byrja að óma út úr þögninni á Rás 1. Þannig markar klukknahljómur upphaf jólahátíðar.

AÐVENTU- OG AFMÆLISGLEÐI RÁSAR 2

Rás 2 býður til aðventu- og afmælisgleði í tilefni af 35 ára afmælis Rásarinnar. Dagskráin verður óhefðbundin og samanstendur af tónlistaratriðum og viðtölum tengdum aðventunni og jólaundirbúningi. Gleðin verður í beinni útsendingu í hljóði og mynd á Rás 2, RÚV.is og á RÚV 2

JÓLATÓNLEIKAR
RÁSAR 2

Árlegir Þorláksmessutónleikar Rásar 2 sendir út í beinni útsendingu.

MAÐUR ÁRSINS

Rás 2 stendur að venju fyrir kosningu á manni ársins í sérstökum áramótaþætti á gamlársdag. Íslendingar kjósa þá manneskju sem þeir telja að hafi skarað fram úr á árinu.

JÓLATÓNLEIKAR STÓRSVEITAR
REYKJAVÍKUR OG GÓA

Gói hittir Stórsveit Reykjavíkur í Silfurbergi í Hörpu. Hann kynnir sér tónlist og hljóðfæri sveitarinnar og tekur lagið með henni. Á efnisskránni eru létt og skemmtileg jólalög í fjörugum útsetningum.

MENNINGARHÁTÍÐ RÚV

Árleg Menningarhátíð RÚV er haldin á Þrettándanum. Þar eru veittar viðurkenningar og styrkir úr öllum menningarsjóðum félagsins – Rithöfundasjóði, Tónskáldasjóði Ríkisútvarpsins, Leiklistarsjóði Þorsteins Ö. Stephensen. Auk þess veitir Rás 2 Krókinn og RÚV tilkynnir um val á orði ársins.

HM Í HANDBOLTA KARLA

Strákarnir okkar mæta til leiks á EM í handbolta í Króatíu. Mótið fer fram 12. – 28. janúar.

ÍSLENSKU BÓKMENNTAVERÐLAUNIN

Íslensku bókmenntaverðlaunin eru afhent á Bessastöðum ár hvert og iðulega í beinni útsendingu á Rás 1. Bókmenntasérfræðingar Ríkisútvarpsins ræða við verðlaunahafann og varpa ljósi á verðlaunaverkið.

MYRKIR MÚSIKDAGAR

Tónlistarhátíðin Myrkir músíkdagar er ein elsta tónlistarhátíð landsins, stofnuð árið 1980 af Tónskáldafélagi Íslands sem vettvangur fyrir íslensk tónskáld til að fá verk sín flutt. Í dag er áhersla hátíðarinnar að flytja og kynna samtímatónlist með áherslu á nýja, íslenska tónlist og flytjendur í bland við erlend verk og erlenda flytjendur. Rás 1 sendir út frá hátíðinni valda tónleika.

EDDAN

Íslensku kvikmynda- og sjónvarpsverðlaunin verða afhent við veglega athöfn sem sýnd verður í beinni útsendingu á RÚV.

SÖNGVAKEPPNIN 2018

Þjóðin velur nýtt lag og flytjanda til að taka þátt í Eurovision sem fram fer í Portúgal í maí 2018.

BIKARÚRSLIT Í HANDBOLTA OG KÖRFUBOLTA

Beinar útsendingar frá bikarúrslitum kvenna og karla í handbolta og körfubolta sem fram fara í Laugardalshöll í janúar og febrúar.

VETRARÓLYMPÍU- LEIKARNIR 2018

Beinar útsendingar frá Vetrarólympíuleikunum í Pyeongchang í Suður-Kóreu 9. – 25. febrúar.

SÖNGKEPPNI SAMFÉS

Efnilegustu söngvarar og söngkonur landsins keppa í Söngkeppni Samfés, samtaka félagsmiðstöðva á Íslandi. Hver félagsmiðstöð sendir sinn fulltrúa til keppni og dómnefnd og áhorfendur velja þá allra bestu. Á vef KrakkaRÚV getur þú kynnst keppendum og fylgst með keppninni.

ÍSLENSKU TÓNLISTARVERÐLAUNIN

Afhending íslensku tónlistarverðlaunanna fer fram í Hörpu og verða í beinni útsendingu á Rás 2 og RÚV.

MÚSÍKTILRAUNIR

Það er löngu orðinn fastur liður að útvarpa úrslitakvöldi Músiktilrauna á Rás 2. Þarna heyra margir Íslendingar fyrst í snillingum framtíðarinnar.

UPPTAKTURINN

Með Upptaktinum, tónsköpunarverðlaunum barna og ungmenna, er áhersla lögð á að hvetja ungt fólk til að semja tónlist og senda inn tónsmíð eða drög að tónverki. Dómnefnd velur úr innsendum hugmyndum og verkin sem eru valin eru fullunninn með aðstoð tónskálda og fagfólks í tónlist. Þú getur hlustað á tónverkin og kynnst keppendum á vef KrakkaRÚV.

HÁTÍÐARDAGSKRÁ UM PÁSKA

Vandað íslenskt dagskrárefni verður aðalsmerki páskadagskrár RÚV, í útvarpi, sjónvarpi og á vefnum, þar sem kappkostað verður að allir muni finna eitthvað við sitt hæfi yfir páskahátíðina.

BARNAMENNINGAR- HÁTÍÐ

Setning Barnamenningarhátíðar verður í Eldborgarsal Hörpu. KrakkaRÚV verður að sjálfsögðu á staðnum og sýnir beint frá athöfninni.

ALDREI FÓR ÉG SUÐUR

Þessi stórskemmtilega tónlistarhátíð byrjaði sem flipp feðganna Muga og Mugisons en hefur aldeilis vaxið fiskur um hrygg síðan og er nú orðin ein stærsta tónleikahelgi ársins. Rás 2 hefur undanfarin ár verið með lifandi útsendingu frá að minnsta kosti einu kvöldi hátíðarinnar og að undanförnu hefur RÚV líka streymt tónleikunum á neti og RÚV 2.

MEISTARADAGAR

Meistaradagar er yfirskrift íþróttahátíðar sem nú er haldin í annað skipti. RÚV og mörg sérsambönd hafa samstarf um hátíðina og keppt verður um bikar- og meistaratitla í veglegri umgjörð og beinni sjónvarpsútsendingu. Margt af allra fremsta íþróttafólki þjóðarinnar verður meðal þátttakenda og keppir um stóra titla í hinum ýmsu greinum hóp- og einstaklingsíþrótta.

STUTTMYNDA- HÁTÍÐ KRAKKARÚV

Í maí stendur KrakkaRÚV fyrir veglegri stuttmyndahátíð fyrir ungmenni um allt land. Dómnefnd, skipuð reynslumiklum kvikmyndagerðarmönnum, velur bestu myndirnar og þær verða sýndar í sjónvarpi allra landsmanna.

EUROVISION

Vinsælasta söngvakeppni í heimi fer fram í Portúgal að þessu sinni og RÚV sýnir að sjálfsögðu beint bæði frá undankeppnunum tveimur og úrslitakvöldinu.

LISTAHÁTÍÐ

RÚV og Listahátíð í Reykjavík hafa átt í samstarfi síðan fyrsta hátíðin var haldin 1970 og gerir viðburðum hátíðarnnar skil í öllum miðlum.

KRAKKAKOSNINGAR

Hvernig samfélag vilja krakkar? Áður hefur KrakkaRÚV staðið að krakkakosningum í tengslum við Alþingiskosningar og forsetakosningarnar í samstarfi við umboðsmann barna og grunnskóla landsins. Árið 2018 eru sveitarstjórnarkosningar og við leitum að sjálfsögðu til barna í tengslum við þær.

SVEITASTJÓRNAR-
KOSNINGAR

Hvernig samfélag vilja krakkar? Fréttastofan verður með ítarlega umfjöllun í öllum miðlum í aðdraganda sveitastjórnarkosninga og kosningavöku í sjónvarpi og á vef á kosningadaga laugardaginn 26. maí.

17. JÚNÍ

Að morgni 17. júní er bein útsending frá hátíðarstund á Austurvelli í Reykjavík sem markar upphaf þjóðhátíðardagskrárinnar. Blómsveigur er lagður að minnisvarða Jóns Sigurðssonar, hátíðarræður fluttar, tónlist leikin og fjallkonan flytur ávarp.

SECRET SOLSTICE

Tónlistarhátíðin Secret Solstice er orðinn fastur liður í flóru íslenskra tónlistarhátíða. Rás 2 er að sjálfsögðu á staðnum með beinar lýsingar og útvarpsþætti frá hátíðarsvæðinu.

GRÍMAN

Íslensku sviðslistaverðlaunin Gríman verða haldin í júní og RÚV mun sýna beint frá hátíðinni.

EISTNAFLUGA

Eistnaflug var fyrst haldin árið 2005 og hefur hátíðin vaxið og dafnað síðan. Rokkið er í þyngri kantinum en hátíðin þekkt fyrir vinalegt andrúmsloft. “Ekki vera fáviti” er kjörorð hátíðarinnar. Rás 2 fylgist grannt með gangi mála á hátíðinni.

HM KARLA Í FÓTBOLTA

Stærsti sjónvarpsviðburður ársins fer fram í Rússlandi. Bestu fótboltalandslið heims berjast um hinn eftirsótta heimsmeistaratitil 14. júní – 15. júlí.

BRÆÐSLAN

Þessi tónlistarhátíð á sér tíu ára sögu og hefur frá upphafi boðið upp á ótrúlega flóru listamanna og hefur verið uppselt á hátíðina undanfarin ár. Rás 2 hefur í allnokkur ár flutt lifandi tónlist frá hátíðinni og kryddað hana með viðtölum við tónlistarmennina sem þar koma fram.

AKUREYRAVAKA

Akureyrarvaka er alltaf haldin síðustu helgina í ágúst sem næst afmæli Akureyrarbæjar 29. ágúst. Rás 2 sendir út beint frá Akureyrarvöku á hverju ári.

TÓNAFLÓÐ Á MENNINGARNÓTT

Stórtónleikar Rásar 2 á Menningarnótt eru orðnir fastur liður í menningarlífi landsmanna og einn stærsti tónlistarviðburður ársins.

JAZZHÁTÍÐ REYKJAVÍKUR

Jazzhátíð Reykjavíkur hefur verið haldin árlega síðasta aldarfjórðung, eða allar götur síðan árið 1990. Frá upphafi hefur hátíðin verið í senn uppskeruhátíð íslenskra jazztónlistarmanna sem og vettvangur til þess að kynna það sem er áhugavert á sviði jazztónlistar á alþjóðlegum vettvangi. Rás 1 sendir út frá völdum tónleikum hátíðarinnar.